LAN JAZARPENA

Euskal Herriko langile guztien % 15ek sufritzen omen dute mobbing-a edo lan-jazarpena. Hala ere, isilpeko gaia da, ez baitugu honi buruz ia hitz egiten eta komunikabideetan ere ezer gutxi ikusten baitugu. Eskola-jazarpena edo bullying-a ezagunagoa da, baina duela 30 urte bullying-ak egindako bidearen hasieran ote dago mobbing-a?

Pertsona batek edo pertsona-talde batek beste baten edo askoren aurka indarkeria psikologikoa erabiltzean gertatzen da lan-jazarpena. Sistematikoki egiten da, denbora-tarte luze batean eta lan-eremuan.

Zuk ezagutzen duzu lan-jazarpen kasurik? Zer uste duzu egingo zenukeela horrelako egoera batean egongo bazina? Gaur egungo arazo larria iruditzen zaizu?

KABI-ETXEAK

Hezitzaileak bere etxean hartzen ditu 3 urte arteko kanpoko umeak bere seme-alabekin batera. Horixe da, hain zuen, hazteko modalidade honen berezitasuna. Espainian nahiko berria da, baina Europako hainbat herrialdetan oso finkatuta eta araututa dago.

Zer deritzozu hezteko modu berri honi? Eramango al zenuke zure haurra honelako “haurtzaindegietara”? Zergatik?

KIROLAK ETA ZALEAK

Epaileek betidanik jasan behar izan dituzte zaleen mespretxuak eta irainak. Egia al da, zure ustez? Eskola kirolean, horrelakorik gerta ez dadin, zer egin beharko litzateke? Nor zigortu beharko lukete?

Alde hemendik!

Zein da UBER entzunda burura datorkizun hitza? Zergatik? Ados al zaude eskaintzen duten zerbitzuarekin? Taxi-gidaria izan nahiko zenuke? Zergatik bai/ez?

HIRIGUNEAN ALA AUZOAN BIZI?

Asko hazi dira hiriak azken hamarkada hauetan. Hori dela eta, gero eta handiagoa da hirigunearen eta auzoen arteko kontrastea.

Badirudi auzoak beraien identitatea galtzen ari direla eta lo egiteko leku huts bihurtzen ari direla. Hori gertatzen ari ote zaio Gasteizi?

Hirigunean zerbitzu guztiak hurbil eduki ohi ditugu. Alabaina, auzoek herri-nortasuna dute. Zein duzu nahiago? Zergatik?

ZIRKUA

Txikitan nork ez du zirkuaren lilura sentitu? Denoi gustatzen zaigu zirkura joan eta ikuskizunaz gozatzea, baina inoiz erreparatu al diogu horien atzean dagoen bizimoduari?

Gizarteak bizitzan egonkortasuna bilatzera bultzatzen gaitu; alabaina, zenbaitek bizimodu nomadaren aldeko apustua egiten dute.

Zirkua gustuko al duzu? Prest egongo zinateke alde batetik bestera bidaiatzeko? Gaur egun artetik bizi daitekeela uste duzu?

Gaztetxoen sexu-heziketa

Gaur egungo gazteek, Internet eta gainerako teknologia berriei esker, inoiz baino eskuragarriago dute edozein gairi buruzko informazioa. Dena den, batzuetan informazio hori ez da aski izaten zerbaiten inguruan jakin beharreko guztia jakiteko. Esate baterako, gaur egun, gaztetxoen sexu-heziketa Internetera mugatuta dago ia, eta, batzuetan, sexualitatearen irudi desitxuratua ematen die horrek.

Zuri zer iruditzen zaizu gaur egungo gazteek jasotzen duten sexu-heziketa? Egokia dela uste duzu? Badago alderik zuk jaso zenuenarekin? Nolako papera jokatu behar dute gurasoek eta eskolak?

TXAKURRAK

Animaliekiko tratu txarrei buruz aritzen garenean, basetxeak, granjak eta horrelakoak etortzen zaizkigu burura. Baina etxean animaliak edukitzea ez al da tratu txarra? Ez ote ditugu gure bakardadea arintzeko erabiltzen? Ez ote dugu beraiekiko botere harremana sortzen? Badaukazu animaliarik etxean? Zergatik?

KULTURA

Kultura dohainik kontsumitzeko ohitura omen daukagu. Zure ustez, zergatik jokatzen dugu horrela? Gaur egun kulturatik bizi daiteke? Irudimen handiko pertsona izango bazina, zer sortzaile mota izango zinateke (idazlea, abeslaria, …)

ZARATA

Osasunerako Mundu Erakundeak (OMS) hainbat zarata-motaren neurketa egin zuen.  Isiltasunetik zarata mingarrirainoko eskala bat erabiltzen da zarata bakoitza kokatu ahal izateko. Hala ere, denok ez ditugu berdin sentitzen zaratak , bakoitzaren pertzepzioa aldatu egiten baita.

Zu,  zer zaratak gogaitzen zaitu? Zergatik? Zure auzoa zaratatsua da? Ba al dago kexarik? Zer dela eta? Lo egiteko arazorik izango bazenu, aldatuko zenuke auzoa?